"El Emperador tomó por mugier la ermana del Conde de Barcelona, é ovo en ella estos fillos, al Rey D. Sancho de Castiella : et el Rey D. Ferrando de Galiza : et la Reyna de Navarra : et la Reyna de Francia. Murió esta ermana del Conde de Barcelona, et tomó el Emperador otra mugier sobrina del Emperador de Alemaña : e ovo en ella una filla, la Reyna Dona Sancha, et casaronla con el Rey D. Alfonso de Aragón, que fue fillo del Comde de Barcelona. El Rey D. Sancho de Castiella fillo del Emperador, tomó mugier la Reyna Dona Blanca, filla del Rey D. Garcia de Navarra, è ovo en ella fillo al Rey D. Alfonso de Castiella. Este Rey D. Alfonso de Castiella tomó por muger à la filla del Rey de Inglaterra, Dona Alionor : et ovo en ella estos dos fillos : el Infant D. Ferrando, et el Infant D. Enric : é ovo della muchas fillas : et casó la mayor Dona Berenguiela con el Rey de Leon : é ovieron dos fillos, el Infant D. Ferrando, è el Infant Don Alfonso : et casó la otra filla con el Rey de Franza : et la otra con el rey de Portugal : et dejó las otras en el Monesterio de las Huelgas cerca de Burgos. Murió el Rey D. Alfonso, et reynó su fillo D. Enric. Mas trebelló con sus mozos, et ferieronlo con una piedra en la cabeza, et murió : et regnó su ermana Dona Berenguiela : et dio el Regno à su fillo D. Ferrando : et regnó d. Ferrando. Da aqui adelant será lo que Dios quisiere".
http://www.vallenajerilla.com/berceo/arizaleta/ecrirehistoiredesrois.htm
No hay comentarios:
Publicar un comentario